තෙල් අර්බුදය හැදුවේ ගන්වර්? - Info Sri Lanka News | Sinhala

තෙල් අර්බුදය හැදුවේ ගන්වර්?


පෙට්‍රල් අර්බුදයට හේතුවී ඇත්තේ ලංකා ඛනිජ තෙල් සංස්ථාවට පෙට්‍රල් සැපයුම ලබාදෙන රුසියානු සමාගමක් වන ගන්වර් (Gunvor) සමාගමට අයත් නෙවෙස්කා ලේඩි (Neverska Lady) නෞකාව පැමිණීමට ප්‍රමාදවීම බව ඉතා විශ්වාස කටයුතු ආරංචි මාර්ගයකින් වාර්තා වේ.

අදාළ සමාගම සිය සැපයුම් ප්‍රමාද කළ පළමු අවස්ථාව මෙය නොවන බවද වාර්තා වේ.

ගන්වර් (Gunvor) සමාගම නෙවෙස්කා ලේඩි (Neverska Lady) හට ඉන්ධන පැටවීම සිදු කළ යුතුව තිබී ඇත්තේ පසුගිය ඔක්තෝබර් 26 වැනිදා වන අතර ඒ අනුව එය ලංකාවට නොවැම්බර් 02 වැනිදා සේන්දුවීමට නියමිතව තිබිණි.

ගන්වර් (Gunvor) නෙවෙස්කා ලේඩි (Neverska Lady) හට ඉන්ධන පටවා ඇත්තෙ පසුගිය නොවැම්බර් 01 වැනිදාය ඒ අනුව අදාළ නැව ලංකාවට සේන්දුවී ඇත්තේ දින 6ක් ප්‍රමාද වීමෙන් පසුවය.

කෙසේවුවද, ලංකා ඛනිජ තෙල් සංස්ථාට ඉන්ධන රැගෙන පැමිණෙන නෞකා සම්බන්ධයෙන් වන කාල සටහන් හා අදාළ කටයුතු සිදුකරනු ලබන්නේ ලංකා ඛනිජ තෙල් සංස්ථාවේ වානිජ අංශය විසින් වන අතර මේ පමාවේ වගකීම ඔවුන් මතද පැටවෙන බව පැවසේ.

තෙල් තොග නැතිවුණේ ඇයි ?

ලංකා ඛනිජ තෙල් සංස්ථාව දින 30කට ප්‍රමාණවත් තෙල් තොග තබා ගතයුතුවුවත්, මේවර එවැනි තෙල් තොගයක් නොමැතිවීමද මේ අර්බුදයට තවත් හේතුවකි.

තෙල් තොග තබා ගැනීමට නොහැකිවූයේ විදෙස් මුදල් සංචිත නොමැතිවීමෙන් බවට මාධ්‍ය වාර්තා පලවුවද අප කළ සොයා බැලීමකදී හෙළිවූයේ ඉන්ධන නැවක් වෙනුවෙන් ගෙවීම් කිරීමට දින 180ක කාලයක් ලැබෙන බවයි.

කෙසේවුවද, විදුලි අර්බුදයක් හේතුවෙන් සපුගස්කන්ද තෙල් පිරිපහදුව දින කිහිපයක් අක්‍රියව පැවතීමද තෙල් අර්බුදය උග්‍ර කිරීමට හේතුවූ බව පැවසේ.

LIOC බාල තෙල් නැව තවමත් ත්‍රී’මලේ

ලංකා ඉන්දියන් ඔයිල් සමාගම විසින් ගෙන්වන ලද බාල පෙට්‍රල් සහිත නැව තවමත් ත්‍රී’මලේ නැංගුරම් ලා තිබෙන බවද මේ අතර වාර්තා වේ.

එම සමාගම අදාළ නැව ගෙන්වා ඇත්තේ Total නැමැති සමාගමින් බවද පැවසේ.

ඉන්දියන් ඔයිල් කියන ෆිල්ටර් කතාවේ සත්‍ය

ඉන්දියන් ඔයිල් සමාගම අදාළ බාල තෙල් ෆිල්ටර් කළේ නම් බෙදා හැරීමට තිබූ බවත්, එය සිදු නොකළේ ඛනිජ තෙල් සංස්ථාව විසින් බවටත් කරන චෝදනාවේ තවත් පැත්තක් ඇති බවද වාර්තා වේ.

මෙසේ ඉන්ධන ෆිල්ටර් කිරීම සිදු කළ යුතු වන්නේ නැවකින් නැවකට බව (Ship to Ship) ක්‍රමවේදයට බව පැවසේ.

අදාළ ක්‍රමය ක්‍රියාත්මක කිරීමට ලංකාවේ පහසුක්ම් නොවන බවද වාර්තා වේ. ලංකාවේ වරායක එවැන්නක් සිදු කිරීම විශාල විනාශයකට අතවැනීමක් බවද වාර්තා වේ.

එවැන්නක් කිරීමට හැකි ලංකාවට ආසන්නම රට වන්නේ මාලදිවයින බවද මේ අතර වාර්තා වේ.


අද ඉන්දියාවත් තෙල් නැවක් දෙයි

ශ්‍රී ලංකාවේ පෙට්‍රල් බෙදාහැරීමේ තිබෙන ගැටලුකාරී තත්ත්වය සමනය කිරීම සඳහා ඉන්දියාව සිය උපරිම සහාය දෙන බව ඉන්දීය අග්‍රාමාත්‍ය නරේන්ද්‍ර මෝදි සඳහන් කර ඇත.

ඉන්දීය අග්‍රාමාත්‍යවරයා හා ජනපති මෛත්‍රීපාල සිරිසේන මහතා අතර ඇතිවූ දුරකතන සංවාදයකදී ඔහු මේ බව සඳහන් කර ඇත.

එයට විසඳුම් වශයෙන් පෙට්‍රල් කිලෝ ලීටර් 21000ක් රැගත් නෞකාවක් අද (09දා) ශ්‍රී ලංකාවට ලබාදීමට ඉන්දීය රජය කටයුතු කර තිබේ.


එසේම ඉන්දීය තෙල් සමාගම සතුව තිබූ පෙට්‍රල් කිලෝ ලීටර් 3500ක්ද වහාම නිකුත් කිරීමට ඔවුන් කටයුතු කර තිබේ.

Share on Google Plus