පොලිස්පති පොලිස් කොමිසමටත් ඉහළින්? - Info Sri Lanka News | Sinhala

පොලිස්පති පොලිස් කොමිසමටත් ඉහළින්?


අපරාධ පරීක්ෂණ දෙපාර්තමේන්තුවේ නව අධ්‍යක්ෂකවරයා ලෙස පොලිස් කොමිසම විසින් ජ්‍යේෂ්ට පොලිස් අධිකාරී ශානි අබේසේකරව පත් කිරීමෙන් අනතුරුව එතෙක් එම තනතුරෙහි සිටි නියෝජ්‍ය පොලිස්පති බී. ආර්. එස්. ආර්. නාගහමුල්ලව වෙනත් කොට්ටාශයක් සඳහා මාරුකර යැවිය යුතුමුත් පොලිස්පති පූජිත් ජයසුන්දර විසින් ඔහුව දිගටම CIDය තුළ ස්ථානගත කරගෙන සිටින බව වාර්තා වේ.  

'තනතුරට හැඩගැසෙන ආකාරය පිළිබඳ පාඨමාලාව' අවසන් වූ වහාම නව නියෝජ්‍ය පොලිස්පතිවරුන්ට නව කොට්ටාශ සඳහා පත්වීම් ලබා දෙන බව කීවද නාගහමුල්ල නියෝජ්‍ය පොලිස්පතිවරයා CIDයෙන් ඉවත්ව යන ආකාරයක් පෙනෙන්නට නොමැත. රවී පීරිස්, ජනක ගුණතිලක, ජගත් පලිහක්කාර, චූලා ද සිල්වා, බී.ආර්. එස්. ආර්. නාගහමුල්ල, එම්. ඒ. ඊ. මහේන්ද්‍ර, එස්. සී. ගලප්පත්ති, ජේ. ටී. ප්‍රියලාල් යන නියෝජ්‍ය පොලිස්පතිවරුන් අට දෙනාට නව තනතුරට හැඩ ගැසෙන ආකාරය පිළිබඳව පාඨමාලාවක් පසුගිය සතියකට ආසන්න කාලයක් පුරා මහජන මුදල් වැයකරමින් ලබා දුන් නමුත් ඔවුන් තනතුරට හැඩගැසෙන ආකාරය උගත් තරම (11) පෙන්වා දුන්නේ ශ්‍රේෂ්ඨාධිකරණ විනිසුරුවරුන්ට පාටි දැමීමට උත්සාහ කරමිනි. 

පොලිස්පතිවරයා දැනට කරමින් සිටින්නේ තමන්ට අවශ්‍ය දේ මිස පොලිස් කොමිසම විසින් නිර්දේශ කරන දේ නොවේ. මෙතක් කලක් සිටියේ CIDය භාර ‍ජ්‍යේෂ්ට නියෝජ්‍ය පොලිස්පතිවරයෙක්, CID අධ්‍යක්ෂක ලෙස ජ්‍යේෂ්ට පොලිස් අධිකාරීවරයෙක්, නියෝජ්‍ය අධ්‍යක්ෂකවරයෙක් ඔහු යටතේ එක් එක් අංශ සඳහා රජයේ නිවේදිත නිලධාරීන්, ඒ යටතේ ස්ථානාධිපතිවරුන් සහ ඉන්පසු විමර්ශන නිලධාරීන් වශයෙන් තනතුරු බෙදියාමකි. එහෙත් දැන් පොලිස්පතිවරයා විසින් මේ මැදට නියෝජ්‍ය පොලිස්පති නාගහමුල්ලව හරස් කරවාගෙන සිටින්නේ CID නව අධ්‍යක්ෂක ශානි අබේසේකරගේ වැඩ කටයුතු වලට අකුල් හෙළීම සඳහා බව පැහැදිලිය. ඔහුට මුල සිටම වුවමනා වූයේ ශානි අබේසේකර මෙම තනතුරට පත්වීම වැළැක්වීමට බව අපි මීට පෙර වාර්තා කළෙමු. 

එසේම පොලිස්පති පූජිත් පොලිස් මූල්‍ය අපරාධ විමර්ශන කොට්ටාශයේ ද (FCID) බලය බිඳීම සඳහා ක්‍රියා කළේය. ඔහු ඒ සඳහා කළේ එහි එතෙක් සිටි අධ්‍යක්ෂකවරයා නියෝජ්‍ය පොලිස්පති තනතුරට උසස්කර මාරු කිරීමය.

කෙසේ වෙතත් මේ සියල්ල දෙස බලන විට පැහැදිලිවම පෙනෙන්නේ පොලිස්පති පූජිත් තම තනතුරට නිසි ලෙසින් හැඩගැසී නොමැති බවය. ඔහුට ඉහළින් නිලධාරියකු පොලිසිය තුළ නොමැති නිසා එය ඉගෙන ගැනීමට අවස්ථාවක් ඔහුට නොලැබුණා වන්නට ද පුළුවන. එහෙයින් දැන් පොලිස් කොමිසම විසින් වහාම කළ යුතුව ඇත්තේ පොලිස්පති තනතුරට හැඩ ගැසෙන ආකාරය පිළිබඳව පාඨමාලාවක් පූජිත ජයසුන්දරට ලබා දීමය.

(LNW)

Share on Google Plus