රවිට එරෙහිව මහින්ද ඡන්දය නොදෙන්නේ ඇයි? [Video] - Info Sri Lanka News | Sinhala

රවිට එරෙහිව මහින්ද ඡන්දය නොදෙන්නේ ඇයි? [Video]


අමාත්‍ය රවී කරුණානායක මහතාට එරෙහිව ඒකාබද්ධ විපක්ෂය විසින් පාර්ලිමේන්තුවට ඉදිරිපත්කර ඇති විශ්වාස භංග යෝජනාවට සුපුරුදු පරිදි ඡන්දය නොදෙන බව හිටපු ජනාධිපති මහින්ද රාජපක්ෂ මහතා පවසයි.

තමා මෙවර පාර්ලිමේන්තුවට පත්වූ පසු කිසිඳු අවස්ථාවක ඡන්දය දී නැතැයි ද ඔහු කියා සිටියි.

ඔහු එබව සඳහන් කලේ, ඊයේ (05) බේරුවල දී අමාත්‍ය රවී කරුණානායක මහතාට එරෙහි විශ්වාසභංගය සම්බන්ධයෙන් මාධ්‍යවේදීන් ඇසූ ප්‍රශ්ණවලට පිළිතුරු දෙමිනි.

රවී කරුණානායක අමාත්‍යවරයාට ඉවත්වන ලෙස ජනපතිවරයා කළ බව කියන දැනුම්දීම සහ එවැනි ඉල්ලීමක් කර නැතැයි අමාත්‍ය රවී කරුණානායක මහතා කර ඇති ප්‍රකාශ සම්බන්ධයෙන් විමසීමේදී මහින්ද රාජපක්ෂ මහතා කියා සිටියේ ඇත්ත කියන්නේ කව්දැයි නොදන්නා බවයි.

රවි කරුණානායක මහතාට එරෙහිව විශ්වාසභංග යෝජනාවට අත්සන් නොකිරීම පිළිබඳව හිටපු ජනාධිපති මහින්ද රාජපක්ෂ මහතාගෙන් මාධ්‍යවේදීහු විමසූ අවස්ථාවේදී ඔහු කියා සිටියේ හැමෝම අත්සන් කිරීමේ අවශ්‍යතාවයක් නොමැති බවයි.

වඩාත් වැදගත් වන්නේ තම මතය නොව ජනතාවගේ මතය බවද මහින්ද රාජපක්ෂ මහතා එහිදී අවධාරණය කර සිටියේය.

රාජපක්ෂ මහතාගේ ප්‍රකාශය පහතින් නැරඹිය හැකියි.




විශ්වාසභංගයට පෙර තීන්දුවක් !

මේ අතර, එක්සත් ජනතා නිදහස් සන්ධාන මහලේකම් අමාත්‍ය මහින්ද අමරවීර මහතා ඊයේ (05) ප්‍රකාශ කර සිටියේ,අමාත්‍ය රවී කරුණානායකට එරෙහිව ඒකාබද්ධ විපක්ෂය ඉදිරිපත් කළ විශ්වාසභංග යෝජනාව පිළිබදව ඡන්ද විමසීමට පෙර පවතින තත්ත්වය පිළිබදව යම් තීන්දුවක් ගැනෙනු ඇති බවයි.

ආණ්ඩුව නියෝජනය කරන ශ්‍රී ලංකා නිදහස් පක්ෂයේ මන්ත්‍රීවරුන් ඇමතිවරුවන් මෙන්ම එක්සත් ජාතික පක්ෂයේ මැති ඇමතිවරුන්ගෙන් ද රවී කරුණානායක අමාත්‍යවරයාට ඉල්ලා අස්වන ලෙස ඉල්ලීම් ඉදිරිපත් වී ඇති බව ඔහු කියා සිටියේ ය.

සියලුදෙනාගේ එකඟත්වයෙන් :

මේ අතර, මාවනැල්ල ප්‍රදේශයේ අද පැවති ඩෙංගු මර්දන වැඩසටහනකට එක්වීමෙන් අනතුරුව එක්සත් ජාතික පක්ෂ මහලේකම් කබීර් හෂීම් කියා සිටියේ යහපාලන ආණ්ඩුව හැමවිටම නීත්‍යානුකූල ක්‍රමවේදවලට අනුව කටයුතු කරන බැවින් රවී කරුණානායක අමාත්‍යවරයා පිළිබදව සියලූදෙනා සාකච්ඡා කර එකගතාවයකට පැමිණෙන බවයි.


Share on Google Plus