නාමල් අත්අඩංගුවට ගැනීමේ සුදානමක්.


තමා අත්අඩංගුවට ගැනීමට රජයේ සූදානමක් පවතින බව පාර්ලිමේන්තු මන්ත්‍රී නාමල් රාජපක්ෂ මහතා පවසයි.

මන්ත්‍රීවරයා පෙන්වාදෙන්නේ ආණ්ඩුවට එරෙහිව කටයුතු කරන දේශපාලඥයින් සිරගතකිරීමේ උත්සාහයක් පවතින බවයි.

මාතර, කඹුරුපිටිය ප්‍රදේශයේ පැවති ජන හමුවකට එක්වෙමින් නාමල් රාජපක්ෂ මන්ත්‍රීවරයා මෙම අදහස් පළ කළේය.

අත්අඩංගුවට ගැනීමට නියෝගයක්

පොලිස් මූල්‍ය අපරාධ කොට්ඨාශයේ උප පොලිස් පරීක්ෂක ශාන්ත ලලිත් මහතාට බැණ වැදී තර්ජනය කිරීමේ සිද්ධිය සම්බන්ධයෙන් පාර්ලිමේන්තු මන්ත්‍රී නාමල් රාජපක්ෂ මහතා අත්අඩංගුවට ගැනීමට පොලිසියට බලතල ඇති බව කොළඹ අතිරේක මහේස්ත්‍රාත්වරයා පෙරේදා (18) අවධාරණය කළේය.

මෙම සිද්ධිය සම්බන්ධයෙන් පාර්ලිමේන්තු මන්ත්‍රී නාමල් රාජපක්ෂ මහතාට අධිකරණයේ පෙනී සිටීමට නොතීසි නිකුත් කරන ලෙස මූල්‍ය අපරාධ කොට්ඨාශය අධිකරණයෙන් ඉල්ලීමක් කර තිබිණ.

එම ඉල්ලීම සලකා බැලූ අවස්ථාවේදී කොළඹ අතිරේක මහේස්ත්‍රාත් චන්දන කලංසූරිය මහතා මේ බව සඳහන් කළේය.

නාමල් රාජපක්ෂ මන්ත්‍රීවරයා පසුගිය15දා මූල්‍ය අපරාධ කොට්ඨාශය තුලදී තමන්ට බැණ වැදුණු ආකාරය පිළිබඳව උප පොලිස් පරීක්ෂක ශාන්ත ලලිත් මහතා පොලිස්පතිවරයාට ද පැමිණිල්ලක් ඉදිරිපත් කර ඇත.

ක්‍රිස් ගනුදෙනුව :

ඉන්දීය ක්‍රිස් සමාගමේ රුපියල් මිලියන 70ක් සාපරාධී සාවද්‍ය පරිහරණය කිරීමේ සිද්ධිය සම්බන්ධයෙන් නාමල් රාජපක්ෂ මන්ත්‍රීවරයාට එරෙහිව විමර්ශනයක් සිදු කෙරෙන අතර, මන්ත්‍රීවරයා මෙලෙස බැණ වැදී ඇත්තේ එම විමර්ශන සිදු කරන උප පොලිස් පරීක්ෂකවරයාටය.

සාක්ෂිකරුවන් සහ වින්දිතයින් ආරක්ෂා කිරීමේ පනත යටතේ නාමල් රාජපක්ෂ මන්ත්‍රීවරයා බරපතල වරදක් සිදු කර ඇති බව පොලිසිය අධිකරණයට දන්වා සිටියේය.

Share on Google Plus