කොළඹ වරායට ගුවන් තොටුපොළක්.


කොළඹ වරායට අනුබද්ධව ගුවන් තොටුපොළක් ඉදිකිරීමට රජයට යෝජනා කර ඇතැයි බස්නාහිර හා මහානගර සංවර්ධන අමාත්‍ය පාඨලී චම්පික රණවක මහතා පැවැසීය.

ඉදිරි වසර 10 තුළදී එය ඉදිකළහොත් කටුනායක ගුවන් තොටුපොළට නොගොස් කොළඹින්ම ගුවන්ගතවීමේ අවස්ථාව ලැබෙන බවද ඔහු පවසා සිටියේය.

කොළඹ කසළ කළමනාකරණයට දහසක බළකායක් ඇති කිරීම සඳහා කොළඹ නව නගර ශාලාවේ පැවැති හමුවකට සහභාගී වෙමින් අමාත්‍යවරයා මේ බව පවසා සිටියේය.

“ලබන වසරේ ජූනි මාසයේ දී කොළඹ ඉදිවන මූල්‍ය නගරයේ ඉදිකිරීම් කටයුතු ආරම්භ කරනවා. මෙහිදී ප‍්‍රධාන වශයෙන් ලෝකයේම තිබෙන බැංකු එම ස්ථානයට ගෙන ඒමට බලාපොරොත්තු වෙනවා. කොළඹ නගරයේ දකුණු වරායට අමතරව නැගෙනහිර හා බටහිර වරාය ඊළඟ අවුරුදු 5 තුළදී ගොඩනැගෙනවා. එයත් සමග නව ජවයක් කොළඹ වරායට ලැබෙනවා.

කොළඹ වරාය මේ කලාපයේ ශක්තිමත්ම වරාය බවට ඉදිරිකාලයේ  දී අපි පරිවර්තනය කරනවා. එසේම අපි රජයට යෝජනා කර තිබෙනවා වරායට අනුබද්ධිතව ගුවන්තොටුපොළක් ඉදිකිරීමටත්. එමගින් කටුනායකට නොගොස් කොටුවෙන්ම ගුවන්ගත වීමට හැකියාව ලැබෙනවා. ඉදිරි වසර 10  තුළ එම යෝජනාව කි‍්‍රයාත්මක කළහොත්. මෙම ආයෝජකයන් කොළඹට එන්නේ නගරය ලස්සනව පිරිසුදුව විධිමත් නගරයක් ලෙස තිබුණොත් පමණයි.

එසේම අලුත් පිම්මක් ගැනීමට නම් නගරයේ දූ දරුවන්ට නිසි අධ්‍යාපනය ලබාදිය යුතුයි. විශ්වවිද්‍යලවලට, වෛද්‍ය පීඨයට, ඉංජිනේරු පීඨයට වගේම කොළඹ නගරයේ ප‍්‍රධාන පාසල්වලට නගරයේ දරුවන් යොමු කළ යුතුයි. ඒවායේ බොහෝමයක් අධ්‍යාපනය ලබන්නේ කොළඹින් පිට දරුවන්. එම ස්ථාන කොළඹ අපේ දරුවන්ගේ ස්ථාන බවට පත් කරගන්න සූදානම් විය යුතුයි ඊළඟ යුගයට කොළඹ රැගෙන යාමට.”

Share on Google Plus