ගෝඨාභය පෙත්සමකට අත්සන් තබයි.


හිටපු හමුදාපතිවරයකු ඇතුළු ජ්‍යෙෂ්ඨ හමුදා නිලධාරීන් දෙදෙනෙකු සහ නිලධාරියකුට එරෙහිව සාක්ෂි ලබාදීමට හිටපු ආරක්ෂක ලේකම් ගෝඨාභය රාජපක්ෂ මහතා බරපතළ වංචා දූෂණ සහ රාජ්‍ය සම්පත් අවභාවිතය පිළිබඳ පරීක්ෂණ පවත්වන ජනාධිපති පරීක්ෂණ කොමිසම හමුවේ ඊයේ (10) දිව්රුම් පෙත්සමකට අත්සන් තැබීය.

හිටපු යුදහමුදාපති ලුතිනන් ජෙනරාල් දයා රත්නායක, මේජර් ජෙනරාල් උදය පෙරේරා, මේජර් ජෙනරාල් හතුරුසිංහ, හිටපු ආරක්ෂක අතිරේක ලේකම් සිරිපාල හෙට්ටිආරච්චි මහත්වරුන්ට එරෙහිව සාක්ෂි ලබාදීමට සාක්ෂිකරුවකු ලෙස ගෝඨාභය රාජපක්ෂ මහතා දිව්රුම් පෙත්සමට අත්සන් තබා තිබේ.

රාජපක්ෂ පාලන සමයේදී අධිආරක්ෂිත කලාපයේ පිහිටි කන්කසන්තුරේ සිමෙන්ති කම්හලින් රුපියල් කෝටි ගණනක යකඩ කපා පිටකිරීමේ මහා පරිමාණයේ වංචාවක් පිළිබඳ ජනාධිපති පරීක්ෂණ කොමිසම විමර්ශනයක් සිදු කරගෙන යනු ලැබේ. ඊට අදාළ වගඋත්තරකරුවන් ලෙස හමුදා නිලධාරීන් සහ සිවිල් නිලධාරියකු කොමිසම විසින් ‍නම් කර තිබේ.

මෙම යකඩ තොගය කපා ඉවත් කරන ලෙසට රාජපක්ෂ මහතා උපදෙස් දුන් බවත් එම උපදෙස් පිළිබඳ තමා ලිඛිත සටහනක් තබා තිබෙන බව හෙට්ටිආරච්චි මහතා කොමිසම හමුවට ප්‍රකාශ කර තිබේ.

මේ අතර රාජපක්ෂලාට සමාව දිය යුතු බව සමහර අය කියන බවත් තමාට නම් එවැනි අනවශ්‍ය සමාවක් අවශ්‍ය නැති බවත් තමන්ට අවශ්‍ය වන්නේ සාධාරණය බවත් සමාව දෙන්න තරම් වැරැද්දක් තමන් සිදුකර නොමැති බවත් හිටපු ආරක්ෂක ලේකම් ගෝඨාභය රාජපක්ෂ මහතා පවසයි.

තමා තේ වතු අරගෙන තියෙනවාද, රබර් වතු අරගෙන තියෙනවාද, ගෙවල් අරගෙන තියෙනවද, හෝටල් හදාගෙන තියෙනවද එසේ නැතිව තමාට කරදර කරන්නේ ඇයිදැයි ඒ මහතා වැඩිදුරටත් පැවසීය.


Powered by Blogger.