ගෝල් ෆේස් රැළියට චීන - පාකිස්තාන් ආධාර - බුද්ධි අංශ විමර්ශනයක්.


ඒකාබද්ධ විපක්ෂයේ මැයි රැලියට චීනය පාකිස්තානය මෙන්ම තවත් රුපියල් කෝටි 18ක මුදලක් එකතු කර දුන් මෙරට ව්‍යාපාරිකයන් කිහිප දෙනකු සම්බන්ධයෙන් බුද්ධි අංශ විශේෂ විමර්ශනයක් සිදු කරමින් සිටින බව වාර්තා වී තිබේ.

මෙරට ව්‍යාපාරිකයන් සම්බන්ධයෙන් මේ වන විට බුද්ධි වාර්තාවක් ද නිකුත් වී තිබෙන අතර එම බුද්ධි වාර්තාවට අනුව මහා මාර්ග ඉදිකිරීම් සහ මෙගා පොලිස් ව්‍යාපෘතිය ඇතුළු ඉදිකිරීම් ක්ෂේත්‍රයේ ව්‍යාපාර කටයුතු කරන කෝටිපති ව්‍යාපාරිකයන් කිහිපදෙනකු මේ සඳහා රුපියල් මිලියනය බැගින් ආධාර ලබා දී ඇති අතර මෙරට මහා පරිමාණ පානීය ජල බෝතල් කර්මාන්තයේ නිරත සමාගමක් ද ඒකාබද්ධ විපක්ෂයේ මැයි රැලිය සඳහා මූල්‍ය ආධාර වෙනුවට වතුර බෝතල් ලක්ෂයක් ලබා දී ඇත.

එසේම ආණ්ඩුවේ ප්‍රබල අමාත්‍යවරුන් කිහිපදෙනකු බුද්ධි වාර්තාවේ නම් සඳහන් ව්‍යාපාරිකයන් කිහිපදෙනකු අමතා මේ පිළිබඳ විමසා ඇති බවත් එහි දී හිටපු ජනාධිපතිවරයා තමන්ගේ පාලන සමයේ ව්‍යාපාර කටයුතු වෙනුවෙන් කළ උදව් උපකාර සිහිපත් කර මේ අවස්ථාවේ රැලිය සඳහා ආධාර කරන ලෙස දුරකථන මාර්ගයෙන් සිදු කළ ඉල්ලීමට අනුව තමන් අදාළ ආධාර මුදල් සැපයූ බව එම ව්‍යාපාරිකයන් පිළිගෙන ඇති බව ද වාර්තා වෙයි.

මේ ආකාරයෙන් ඒකාබද්ධ විපක්ෂයේ මැයි රැලිය සඳහා චීනය සහ පාකිස්තානය ආධාර කර ඇති බවට පළව ඇති වාර්තා සම්බන්ධව වැඩිදුර විමසීම සඳහා අප විදේශ කටයුතු අමාත්‍ය මංගල සමරවීර සම්බන්ධ කර ගැනීමට උත්සාහ කළ නමුත් එය සාර්ථක වූයේ නැත.

-කුසල් ජයම්පති (සත්හඬ)

Share on Google Plus