ගීතිකා නොදැක්ක හීනයක් වෙන අය දැකලා.


ගීතිකා කොහොමද ජීවිතේ?
වරදක් නැහැ. හොඳින් ඉන්නවා.
මේ දවස්වල පුංචි තිරයේ නම් පේන්න නැහැනේ?
මම සම්බන්ධ වුණ "මගේ ආදර අවනඩුව" ටෙලි නාට්‍යයත් විකාශය වෙලා ඉවරයි. හැබැයි මම තවත් ටෙලි නාට්‍යයකට සම්බන්ධ වුණා. ටෙලි නාට්‍යය "තුරුම්පු ආසියා". ඒකත් මම ආස කරන විදිහේ චරිතයක්. චින්තක පීරිස් අයියා තමයි එහි තිරපිටපත ලියන්නේ. එයා තමයි මාව ඒ නාට්‍යයට සම්බන්ධ කර ගත්තේ.
ඒ කියන්නේ පේන්න නොහිටියට ගීතිකා වැඩ නේද?
ඔව්. හැබැයි මම ගොඩක් කාර්යබහුල වෙන්න කැමැති නැහැ. ඉස්සර නම් ෂූටින් අතරතුර නිදහසේ ඉන්න කාලයක් හොයා ගත්තා. හැබැයි දැන් නිදහසේ ඉද්දී ෂූටින් යනවා. දැන් ඉතින් නිදහසේ හිටියා ඇති. ආයෙත් වැඩ පටන් ගන්න ඕන.
විවාහයෙන් පස්සේ ගීතිකාට ලැබෙන අවස්ථා අඩුද?
මෙහෙමයි. සමහර නිර්මාණකරුවන් රංගන ශිල්පිනියන් විවාහ වුණාම ඔවුන්ව වැඩවලට සම්බන්ධ කරගන්න කැමැති නැහැ. මොකද එයාලා විවාහ වෙලා අම්මා කෙනෙක් වුණොත් නිර්මාණය වෙනස් කරන්න වෙයි, නිර්මාණයේ ගලා යෑමට හානියක් වෙයි කියලා ඒ අය හිතනවා. විවාහ වුණාම වැඩවලට ගන්න සමහර නිර්මාණකරුවෝ බය වෙන්නේ ඒ නිසා. මටත් ඒ වගේ ලැබෙන්න තිබ්බ නිර්මාණ තුන හතරක්ම නැති වුණා. මම නම් වැඩක් භාර ගත්තොත් ඒක විනාශ කරලා මගේ හීනවලට යන්නෙ නෑ.
එතකොට ගීතිකා මවක් වෙන හීනය තාම දකින්නේ නැද්ද?
මමයි මගේ සැමියයි තාම ඒ හීනය දකින්නේ නැහැ. හැබැයි අපිට කලින් වෙන අය ඒ හීනය දැකලා. ඒ නිසා මට වැඩ කිහිපයක් නැති වුණා.
විවාහයෙන් පස්සේ සමහර රංගන ශිල්පිනියන් කැමැත්තෙන්ම ක්ෂේත්‍රයෙන් අයින් වෙනවා. නැත්නම් සැමියා බිරිදව ක්ෂේත්‍රයෙන් ඉවත් කරනවා. ගීතිකාට එහෙම ප්‍රශ්න ආවේ නැද්ද?
සමහර අවස්ථාවල වැඩ බැලන්ස් කරගන්න බැරි වුණාම අවස්ථා මඟහරින්න වෙලා තියෙනවා. ඉතිං මම කැප කිරීම් කළා කියලා හිත හදාගන්නවා. මට වේදිකා නාට්‍යවල වැඩ ලැබුණා. ඒත් ඒවට කාලය දෙන්න බැරි වුණ ප්‍රශ්නයක් නිසා ඒ වැඩේ අතහරින්න වුණා. විවාහ වුණාට පස්සේ කැප කිරීම් කරන්නත් සිද්ධ වෙනවා. හැබැයි සැමියා මට රංගනයෙන් අෑත් වෙන්න කියලා නැහැ.
අවස්ථා ගිලිහෙන එක ගැන දුකක් නැද්ද?
ඉස්සර නම් මට හම්බෙන්න තිබ්බ දෙයක් නැති වුණාම දුක හිතිලා තියෙනවා. හැබැයි දැන් එහෙම නැහැ. දෙයක් නැති වුණොත් තව හොඳ දෙයක් හම්බෙයි කියලා මම හිත හදාගන්නවා. ඒ වගේම මට දැන් පවුල් ජීවිතයෙත් වගකීම් තියෙනවනේ.
ගීතිකා වැඩිබර දෙන්නේ පවුලටද? වෘත්තියටද?
මම පවුල් ජීවිතයයි, වෘත්තියයි දෙකම සමබර කරගෙන යනවා. ගොඩනඟාගත්ත දේවල් මට නැති කරගන්න බෑ. ඉතිං මට මගේ සැමියාගෙනුත් හොඳ සහයෝගයක් ලැබෙනවා.
ගීතිකාට ලැබෙන රංගන අවස්ථා භාරගන්නේ සැමියාගේ එකඟත්වයත් බලලද?
මට තිරපිටපතක් ලැබුණොත් ඒක මට කලින් එයා කියවලා බලනවා. එයාට ඩ්‍රාමා ගැන දැනුමක් තියෙනවා. ඉතිං එයාගෙන් ලැබෙන උපදෙස් මට වටිනවා.
ෂූටින් යද්දී දැන් සැමියා ගීතිකා පස්සෙන්ම කියන්නේ ඇත්තද?
මෙහෙමයි එයයි මමයි එක වාහනේ වැඩවලට යන්නේ. එයා මාව ෂූටින් දාලා ආයෙත් ගන්නත් එනවා. ඉස්සර නම් මම තනියම තමයි ෂූටින් ගියේ. හැබැයි දැන් එයත් නිදහස් වෙලාවක නම් ෂූටින් තියෙන තැනට ඇවිත් ඉන්නවා.
සැමියා තනි නොතනියට එක්ක යන්නේ ආරක්‍ෂාවටද?
මට ඉස්සරත් ආරක්‍ෂාව තිබුණා. මම ක්ෂේත්‍රයට ආපු දවසේ ඉඳන් මට හම්බුණ හැමෝම පවුලේ අය වගේ. ඉතිං මට මේ ක්ෂේත්‍රයේ එදත් ආරක්‍ෂාව තිබුණා. අදත් ආරක්‍ෂාව තියෙනවා.
පුංචි තිරයෙන් එළියට යන්න අදහසක් නැද්ද?
සිනමාවට එකතුවෙන්නත් හීනයක් තියෙනවා. දැනට ඒ ගැන පොඩි සේයාවකුත් තියෙනවා. බලමු ඉදිරිය කොහොම වෙයිද කියලා. ඒ වගේ වේදිකාවටත් සම්බන්ධ වෙන්න බලාපොරොත්තුවක් තියෙනවා.
ගත්ත උපාධියෙන් වැඩක් ගත්තොත් නරකද?
අපේ අම්මත් කියනවා ගත්ත උපාධියෙන් වැඩක් ගන්න කියලා. මට තියෙන්නේ විද්‍යා උපාධියක්. ඉතිං ඒකට සුදුසු රැකියාවක් ලැබුණොත් සම්බන්ධ වෙනවා. ඊට අමතරව කලාව පැත්තෙන් හැදෑරිමක් කරන්නත් බලාපොරොත්තුවක් තියෙනවා.
තිළිණි කෞශල්‍යා විජේසිංහ

Share on Google Plus