කොටි චිත්‍රපටියට ඉන්දියාවෙන් වාරණයක්



කොටිහඩ රූපවාහිනි නිවේදිකාවක් ලෙස කටයුතු කළ ඉසප්‍රියා මෙරට යුද්ධයේදී ආරක්ෂක හමුදා අතින් අමානුෂික ලෙස ඝාතනය වූ බවට සකස් කළ තමිල්නාඩු චිත්‍රපටයක් ප්‍රදර්ශනය කිරීම මදුරාසි මහාධිකරණය විසින් තහනම් කර තිබෙනවා. 

කේ. ගනේෂන් නමැති කොලිවුඞ් චිත්‍රපට අධ්‍යක්ෂවරයා නිම වූ පෝර්කලාතිල් - ඔරු - පූ හෙවත් යුද බිමේ කුසුම ලෙස නම් කළ මෙම චිත්‍රපටය ප්‍රදර්ශනය සදහා අවසර ලබාදීම ඉන්දීය සිනමා රැගුම් පාලක මණ්ඩලය ප්‍රතික්ෂේප කර තිබුණා.

ඒ සදහා අතුරු තහනම් නියෝගයක් ද නිකුත් කර තිබුණේ ඉසප්‍රියාගේ මව සහ සොහොයුරිය ඇතුළු ඥාතීන් ඉදිරිපත් කළ පෙත්සමකට අනුවයි. 

එම නියෝගය තහවුරු කරමින් මදුරාසි මහාධිකරණය ඊයේ ප්‍රකාශ කළේ එම චිත්‍රපටය ප්‍රදර්ශනය කිරිමෙන් ඉන්දු - ශ්‍රී ලංකා සබදතාවලට ද හානියක් සිදුව හැකි බවයි.

මෙම චිත්‍රපටය මගින් ඉන්දීය සහ ශ්‍රී ලංකා ආරක්ෂක හමුදා විවේචනය කරන අතරම, එල්.ටී.ටී.ඊ සංවිධානයේ ඊලාම් සිහිනය සාධාරණීකරණය කිරීමට උත්සාහ ගෙන ඇති බවයි මදුරාසි මහාධිකරණයේ විනිසුරු ටී.එස්. සිවඥානම් ප්‍රකාශ කළේ. 

ප්‍රචන්ඩත්වය ප්‍රවර්ධනය කරන එම චිත්‍රපටය නැරඹීමෙන් ප්‍රේක්ෂකයන්ගේ සිත්සතන් දූෂණය වන බව ද විනිසුරුවරයා පෙන්වා දුන්නා. 

ඉන්දියාවේ පවත්නා නීති රාමුව යටතේ ප්‍රචන්ඩත්වයට අනුකම්පාවක් දැක්වීම ප්‍රවර්ධනය නොකරන බව විනිසුරුවරයා එහිදී පෙන්වා දුන් තවත් කරුණක්. 

විශේෂයෙන් ශ්‍රී ලංකාවේ ජනතාව පිළිබද ප්‍රතිරූපයට සංවේදී වන එම චිත්‍රපටය මහජන ප්‍රදර්ශනයට නුසුදුසු බවයි මදුරාසි මහාධිකරණ විනිසුරුවරයා ප්‍රකාශ කළේ


Share on Google Plus

0 comments:

Post a Comment