ටිරාන් අලස්ට අධි චෝදනා.


රුපියල් මිලියන දෙසීයක් පමණ සාපරාධී සාවද්‍ය පරිහරණ කළ බව කියන රාඩා ගනුදෙනු සිද්ධියේ හිටපු පාර්ලිමේන්තු මන්ත්‍රී ටිරාන් අලස් ඇතුළු සිව්දෙනකුට අධිචෝදනා ගොනුකළ හැකි බවට නීතිපතිවරයා නිර්දේශ කර ඇත.

මේ බව නීතිපතිවරයා කොටුව මහේස්ත්‍රාත් හා අතිරේක දිසා විනිසුරු ලංකා ජයරත්න මෙනවියට ඊයේ (11) දන්වා ඇත.

නීතිපතිවරයා මෙසේ දන්වා ඇත්තේ පොලිස් විශේෂ විමර්ශන ඒකකය රාඩා ගනුදෙනුවට අදාළ විමර්ශන ලිපි ගොනු නීතිපතිවරයාගේ උපදෙස් සඳහා යොමුකිරීමෙන් අනතුරුවය.

මෙලෙස අධිචෝදනා ගොනුකිරීමට නීතිපතිවරයා නිර්දේශ කර ඇත්තේ හිටපු පාර්ලිමේන්තු මන්ත්‍රී ටිරාන් අලස් හිටපු එල්. ටී. ටී. ඊ. නායකයකු වූ එමිල් කාන්තන් රාඩා ආයතනයේ හිටපු අධ්‍යක්ෂවරයකු වූ සාලිය වික්‍රමසූරිය හා ආචාර්ය ජයන්ත ඩයස් සමරසිංහ යන අයට වේ.

ව්‍යසනයේ විපතට පත් උතුරු නැ‍ඟෙනහිර ජනතාවට නිවාස ව්‍යාපෘතියක් සාදා දෙන බව පවසා මෙම මුදල් සාවද්‍ය පරිහරණය කළ බව සැකකරුවන්ට චෝදනා එල්ල කර තිබිණි.

මෙම සිද්ධියට අදාළ එල්. ටී. ටී. ඊ. හිටපු නායකයකු වන එමිල් කාන්තන් නමැත්තා විදේශගතව සිටින අතර මොහුට එරෙහිව මහාධිකරණයේ ඇති වෙනත් නඩුවලට විවෘත වරෙන්තු නිකුත් කර ඇත.

මෙම සිද්ධියට සැකකරුවන් ලෙස නම් කර සිටි ශාන්ති ගජන් කුමාර්, ආනන්දි ශාන්ති කුමාර්, කන්දසාමි සෝන්ද් රාජා හා ශ්‍රීහරන් සුදත් යන අය නිදහස් කිරීමට හැකි බව නීතිපතිවරයා වැඩිදුරටත් නිර්දේශ කර ඇත.

Share on Google Plus