ප්‍රසන්න රණතුංගගේ කප්පම් නඩුව මහාධිකරණයට.


ඉඩමකින් අනවසර පදිංචිකරුවන් ඉවත් කිරීමට සහ එම ඉඩම ගොඩ කිරීම සඳහා ව්‍යාපාරිකයකුගෙන් රුපියල් මිලියන හැට හතරක කප්පමක් ඉල්ලා සිටීමේ සිද්ධිය සම්බන්ධයෙන් බස්නාහිර පළාතේ හිටපු මහ ඇමැති ප්‍රසන්න රණතුංග ඇතුළු හතරදෙනකුට එරෙහිව කොටුව මහෙස්ත්‍රාත් අධිකරණයේ පවරා තිබූ නඩුව මහාධිකරණය වෙත යොමුකර ඇති හෙයින් මින් ඉදිරියට මහාධිකරණයේ පෙනී සිටින ලෙස මහෙස්ත්‍රාත් ලංකා ජයරත්න මෙනෙවිය විත්තිකරුවන්ට නියෝග කර තිබේ.

හිටපු මහ ඇමැති ප්‍රසන්න රණතුංග, ඔහුගේ බිරිය මොරින් ස්ටෙලා රණතුංග, ක්‍රිස්ටීන් ශිවන්ති වනිගසේකර, නරේශ් ෆාරික් කුමාර් මෙහි විත්තිකරුවන් ලෙස නම්කර තිබිණි.

මොරටුව උයන පාරේ අංක 66/12 පදිංචි ශෙහාඩ් මෙන්ඩිස් නමැති ව්‍යාපාරිකයකුට මීතොටමුල්ල පාරේ අංක 251/9 දරන ස්ථානයේ පිහිටි අක්කර දෙකක ඉඩමක් බහාලුම් පර්යන්තයක් සහ ගබඩා සංකීර්ණයක් ඉදිකිරීම සඳහා කුලී පදනම මත බස්නාහිර පළාත් සභාවට ලබාදීමට සහ එහි අනවසර පදිංචිකරුවන් ඉවත් කර ගොඩකිරීම සඳහා මිලියන හැට හතරක මුදලක් ඉල්ලා මිලියන පහළොවක මුදලක් ලබාගත් බවට පැමිණිල්ලේ සඳහන්ව ඇත. 

මේ මුදල ලැබෙන බව සනාථ කිරීම සඳහා ගිවිසුමක් අස්සන් කර ඇති අතර එක් පාර්ශ්වයක් සඳහා ප්‍රසන්න රණතුංගගේ බිරිය මොරින් ස්ටෙලා රණතුංග, ඇයගේ සහෝදරියගේ පුතාගේ බිරිය වන ක්‍රිස්ටීන් ශිවන්ති වනිගසේකර, ඉඩමේ මුල් අයිතිකරු අජිත් ස්වර්ණප්‍රිය යන අය අස්සන් කර ඇති අතර අනෙක් පාර්ශ්වය වෙනුවෙන් පැමිණිලිකරු වන ශෙහාඩ් මෙන්ඩිස් අස්සන් කර ඇති බව පැමිණිල්ලෙන් කියැවිණි.

Share on Google Plus