රංග කලංසූරියගේ ඉල්ලා අස්වීම ප්‍රතික්ෂේපයි


රජයේ ප්‍රවෘත්ති අධ්‍යක්ෂ ජනරාල් ආචාර්ය රංග කලංසූරිය අද (26) සිය ඉල්ලා අස්වීමේ ලිපිය ජනාධිපතිවරයා වෙත භාර දී තිබේ.

නමුත් ජනාධිපතිවරයා එම ලිපිය ප්‍රතික්ෂේප කර ඇතැයි පැවසේ.

පසුගිය සතියේ පැවැති කැබිනට් මණ්ඩල රැස්වීමේ දී ජනාධිපතිවරයා විසින් රංග කලංසූරිය භයානක පුද්ගලයකු බවත්, ඔහු ජනාධිපතිවරයා සහ අගමැතිවරයා කොටවන්නට කටයුතු කරන්නකු බවත් පවසා තිබුණු බව ‘මව්බිම’ පුවත්පත වාර්තා කර තිබිණි. ඉරිදා මව්බිම පුවත්පතේ කැබිනට් එක තීරුවේ පළ වූ මේ කරුණ අසත්‍ය බවක් ජනාධිපතිවරයාගේ පාර්ශ්වයෙන් මෙතෙක් නිවේදනය නොකිරීම නිසා ආචාර්ය රංග කලංසූරිය මෙසේ ඉල්ලා අස්වීම භාර දී ඇත. ඔහුට සමීප ආරංචි මාර්ග පවසන්නේ අදාළ මව්බිම පුවත්පත 23 වැනි සෙනසුරාදා වෙලඳපොළට නිකුත් කළ බවත්, දින තුනක් ගතවීත් ඊට ප්‍රතිචාරයක් නොදැක්වීම සැලකිය යුතු කාරණයක් බවත් ආචාර්යවරයා පැවසූ බවයි.

කෙසේ වෙතත් අදාළ ඉල්ලා අස්වීමේ ලිපිය ජනාධිපතිවරයා විසින් භාරගෙන නැති බවත්, ඒ වෙනුවට ඇතැම් පුවත්පත් වල අසත්‍ය ප්‍රචාරයන් ගණන් නොගන්නා ලෙස ආචාර්යවරයාට දැනුම් දී ඇති බවත් ජනාධිපති කාර්යාල ආරංචි මාර්ග පවසයි. ජනාධිපතිවරයා, අගමැතිවරයා, ජනමාධ්‍ය ඇමැති ගයන්ත කරුණාතිලක සහ නියෝජ්‍ය ඇමැති කරු පරණවිතාන මේ ගැටළුව සම්බන්ධයෙන් අද උදෑසන සාකච්ඡාවක් ද පවත්වා ඇති අතර, එහි දී තීරණය කර ඇත්තේ රංග කලන්සූරියට එරෙහිව අසත්‍ය පුවත් පළ කිරීමට එරෙහිව ක්‍රියාමාර්ග ගැනීමට ය.

‘රංග කලංසූරිය භයානක මිනිහෙක්-මෛත්‍රීගෙන් හෙළිදරව්වක්’ යන ශීර්ෂ පාඨය යටතේ පළ කර තිබූ අදාළ ලිපියේ උප ශීර්ෂ පාඨයක් යටතේ ‘රනිල්-මෛත්‍රී කොටවන්නත් හදලා’ යනුවෙන් ද සඳහන් කර ඇත.

Share on Google Plus