පාද යාත්‍රාවට මෛත්‍රි දමපු වෙට්ටුව.


මෛත්‍රි සහ රනිල් අපූරු වෙට්ටු දෙකක් දැම්මේය. පළමු වෙට්ටුව එ.ජා.ප. - ශ්‍රී ල.නි.ප. හවුල් ආණ්ඩුව දික් කිරීමට සාකච්ඡා කරන බවට කළ ප්‍රකාශයය. එ.ජා.ප. - ශ්‍රී ල.නි.ප. හවුල් ආණ්ඩුවේ කාලය දික් කරන බවට කළ ප්‍රකාශයට මහින්ද කොයි තරම් බය වෙලාද කියනවා නම් ඒ ගැන තවම තීරණයක් ගෙන නැතැයි මෛත්‍රි තමන් හමුවීමේදී ප්‍රකාශ කළ බව ඒකාබද්ධ විපක්‍ෂය පවසා තිබිණි.

මහින්දලා මේ පාද යාත්‍රා යන්නේ ආණ්ඩුව වට්ටවන්න නම් ඒ සඳහා පාර්ලිමේන්තුවේ 113ක් හදාගත යුතුය. ශ්‍රී ල.නි.ප.යට ඉන්නේ 95ය. එයින් කොටසක් ඉන්නේ එ.ජා.ප. ශ්‍රී ල.නි.ප. හවුල් ආණ්ඩුවේය. ඔවුන් හවුල් ආණ්ඩුවෙන් එළියට ගන්න බැරි නම් දවස් 365ම පාද යාත්‍රා ගියත් ආණ්ඩුව වට්ටවන්න බැරිය. ඔවුන් හවුල් ආණ්ඩුවෙන් එළියට ගත්තත් තව මන්ත්‍රිවරු 18ක් ආණ්ඩුවක් හදන්න ඕන වේ. ඒකට සුළු ජාතික මන්ත්‍රිවරු බා ගන්න ඕනෙය. හැබැයි අද මහින්ද එක්ක ජාතිවාදී විමල්ලා, දිනේෂ්ලා ඉන්නකම් සුළු ජාතික පක්‍ෂ බා ගන්නවා බොරුය. ඒත් මහින්දලා හිතන්නේ ශ්‍රී ල.නි.ප. මන්ත්‍රි 95 එකට එකතු කර ගත්තොත් සුළු ජාතික මන්ත්‍රිවරු බා ගන්න පුළුවන් කියාය.

එ.ජා.ප. - ශ්‍රී ල.නි.ප. හවුල් ආණ්ඩුවේ කාලය දික් කරනවා කියා ශ්‍රී ල.නි.ප. ලේකම් කළ ප්‍රකාශයෙන්ම මහින්දලාගේ ඒ හීනය බිඳ වැටී තිබේ. මහින්දලා පාද යාත්‍රාව පටන් ගත්තේ පාද යාත්‍රාව මැදදී හවුල් ආණ්ඩුවේ ශ්‍රී ල.නි.ප. ඇමැතිවරුන් එකා දෙන්නා පාද යාත්‍රාවට එකතු කර ගන්නටය. දැන් වැඩේ වැරැදී තිබේ. හවුල් ආණ්ඩුව දිගට යනවා කියන්නේ තව අවුරුදු ගාණක් ඒකාබද්ධ විපක්‍ෂයට වොයිස් කට් දිදී ඉන්න සිදු වීමය.

ඒකාබද්ධ විපක්‍ෂයේ ඉන්න චරිත දිහා බැලුවම විපක්‍ෂයේ ඉන්න ඉවසීමක් තියෙන අය එතැන නැත. මේ ලෙඩේ වසර 17ක් ආණ්ඩු කරලා විපක්‍ෂයට ගිය එ.ජා.ප.යටත් හැදුණි. එකල එ.ජා.ප.යේ සිටි විජයපාල මෙන්ඩිස්, නන්ද මැතිව් වැනි නායකයන්ට විපක්‍ෂයේ ඉන්න බැරි ලෙඩක් තිබිණි. ඒ අවුරුදු ගාණක් ඇමැතිකම් කරලා පුරුද්දය. මේ හැමෝටම ඉක්මනින් ආණ්ඩුවක් ඕනෑ විය. රනිල් ඉක්මන් ආණ්ඩුවක් හදන්න උනන්දු නොවූ නිසා ඔවුන් සිරිසේන කුරේ පසුපස ගියේ කුරේ ආණ්ඩුව පෙරළයි කියා හිතාගෙනය. චන්ද්‍රිකා කුරේව නිවාස අඩස්සියේ තබපු විට මේ හැමෝම වැටුණි. අවසානයේ හැමෝම ගිහින් චන්ද්‍රිකා ළඟ දණින් වැටිලා ඇමැතිකම් ගත්හ.

මේ ඒකාබද්ධ විපක්‍ෂයේ ඉන්නෙත් ඒ වගේ කට්ටියක්ය. ඔක්කෝටම කලින් ඇමැති මණ්ඩලය හදා ගත්තේ ඇමැතිකම් නැතිව ඉන්න බැරි නිසාය. අන්තිමේදී නැති ඇමැතිකම්වලටත් ගහගෙන ඇමැති මණ්ඩලය විසුරුවා ගත්තේය. ඉතින් හවුල් ආණ්ඩුව තව කල් යනවා නම් ඔවුන්ට තව කලක් අදින්න බැරිය. හවුල් ආණ්ඩුවේ කාලය දික් කරන කතාවෙන්ම පාද යාත්‍රා යන ඒකාබද්ධ විපක්‍ෂයේ කකුල් වෙව්ලන්න පටන් ගෙන තිබේ. මෛත්‍රි සහ රනිල් හවුල් ආණ්ඩුවේ කාලය දික් කරනවා කියා පාද යාත්‍රාවට වෙට්ටුවක් දමා ඇතැයි කීවේ ඒ නිසාය.

පාද යාත්‍රාවට දෙවැනි වෙට්ටුව දැම්මේ මෛත්‍රිය. ඒ පාද යාත්‍රාවට කලින් රාජපක්‍ෂලා නැතිව ඒකාබද්ධ විපක්‍ෂය හමු වීමෙනි. එහිදී මෛත්‍රි නොකියා කීවේ ආණ්ඩුවක් හදන්න ඕනෑ නම් නුවර ඉඳලා කොළඹට පාද යාත්‍රා හදන්න ඕනෑ නැහැ මගේ ළඟට වරෙල්ලා කියාය. ඒ වගේම ඇමැතිකම් ඕනෙ නම් පාද යාත්‍රා යන්න ඕනෑ නැහැ මම දෙන්නම් කියාය.

ඒකාබද්ධ විපක්‍ෂයට තියෙන ඇමැති ගාය මෛත්‍රි හොඳින් දනී. මොවුන්ගෙන් සමහරක් එ.ජා.ප.යෙන් ඇමැතිකම් දෙනවා නම් එ.ජා.ප. ආණ්ඩුවක් හදන්න සහාය දෙන්න සාකච්ඡා කරන බවත් මෛත්‍රි දනී. ඔහු රාජපක්‍ෂලා නැතිව ඒකාබද්ධ විපක්‍ෂයට එන්න කී විට ඒකාබද්ධ විපක්‍ෂය ඔහු හමුවට ගියේ කං කං බූරු චිං චිං නෝරු සෙල්ලමට ළමයි දුවන්නා වගේය. රාජපක්‍ෂලාට එම රැස්වීම දැනුම් දී නැති බව රැස්වීමට කලින් ඔවුන් දැන නොසිටියා විය නොහැකිය. මන්ද ඔවුන් එම රැස්වීමට යන්න පෙර එකිනෙකා කථිකා කරගෙන යන්න ඇත. රාජපක්‍ෂලාට රැස්වීමට ආරාධනා කර නැති බව දැන ගත්තේ රැස්වීමට ගිය විටදී නම් ඔවුන්ට රැස්වීමෙන් නැඟිට එන්න පුළුවන්කම තිබිණි. එහෙත් ඔවුන්ට ඇමැතිකම් ගන්න පමණක් නොව තම පෙර වැරැදි නොහොත් ඔවුන්ට එරෙහි දූෂණ චෝදනා වහගන්නත් මෛත්‍රිව ඕනෑය. රාජපක්‍ෂලා ඔවුන්ට එරෙහි චෝදනා වහ ගන්න තමන්ව පාවිච්චි කරන බව ඒකාබද්ධ විපක්‍ෂය දනී. ඉතින් තමන්ට එරෙහි දූෂණ චෝදනා වහගන්න රාජපක්‍ෂලා පාවිච්චි කිරීම වැරැදි නැතැයි ඔවුන්ද හිතනවා විය යුතුය. මෛත්‍රි සහ ඒකාබද්ධ විපක්‍ෂයේ රැස්වීමෙන් පේන්නේ ඒකාබද්ධ විපක්‍ෂය ඕනෑ මොහොතක රාජපක්‍ෂලා අතහැර මෛත්‍රි එක්ක ආණ්ඩු පිහිටුවන්න හෝ ඇමැතිකම් ගන්න සූදානම් බවය. මෛත්‍රි ඒ රැස්වීමෙන් පෙන්නුවේ ඒකට රාජපක්‍ෂලා එක්ක පාද යාත්‍රා ගිහින් නහින්න ඕනෑ නැහැ කියන එකය. මෛත්‍රි ඒකාබද්ධ විපක්‍ෂය තමන් ළඟට ගෙන්වා ගත්තේ හවුල් ආණ්ඩුවේ කාලය දික් කරනවා කියන තර්ජනය දමලාය.

කොහොමත් අර්ජුන් මහේන්ද්‍රන්ගේ සිද්ධියෙන් පසු ඒකාබද්ධ විපක්‍ෂ චූන් වෙලා හිටියේ මෛත්‍රි - රනිල් දීගය ඉවර වෙයි කියාය. අර්ජුන්ව ඉවත් කිරීම ගැන රනිල් මෛත්‍රි සමඟ අමනාපයෙන් පසු වන බවත්, දැන් රනිල් මෛත්‍රිට වැඩක් දෙන්න තමන් සමඟ එකතු වෙයි කියලා රාජපක්‍ෂලා සිතූහ. පාද යාත්‍රාව සංවිධානය වුණේ ඒ හීන මැදය. හැබැයි පක්‍ෂ දෙකේ ලේකම්වරුන් හවුල් ආණ්ඩුවේ කාලය දික් කර ගන්නා බව කී විට ඒ හීනය කඩා වැටුණි.

1999 සිට අවුරුදු 20ක් එ.ජා.ප.යත් මේ වගේ හීන දැක්කේය. එ.ජා.ප.යත් උද්ඝෝෂණ කළේය. ජන බල මෙහෙයුම් කළේය. ජන බල මෙහෙයුමකට ලොකු සෙනඟක් ආ විට එදින සවස එ.ජා.ප.ය ආණ්ඩු හදන්න හීන මැවූහ. මහින්දලාගේ හයිඩ් පාර්ක් රැස්වීමට පසු එ.ජා.ප. ඇමැතිවරයෙක් ඒ ගැන මරු කතාවක් කීවේය.
"ඉස්සර අපිත් උද්ඝෝෂණ තියනවා. ජන බල මෙහෙයුම් කරනවා. එදාට සෙනඟ දැකලා අපි ආණ්ඩුව හදලත් ඉවරයි. හැබැයි දවසයි. දෙකයි. පස්සේ බලන කොට තවම විපක්‍ෂයේ..."
මේ ඔහු හිනා වෙමින් කී කතාවය.

මහින්දලාත් හයිඩ් පාක් රැස්වීම කරලා ආණ්ඩුව අද හෙට හදන්න වගේ කතා කළේය. දැන් හයිඩ් පාක් කෑලිත් නැත. පාද යාත්‍රාව පෙන්නලා අපි ආණ්ඩුව හදනවා කියලා සතියක් දෙකක් මහින්දවාදීන් කෑ ගහනවා නම් ෂුවර්ය. ඉන් පස්සේ පාද යාත්‍රාවක් කළාද කියලවත් ජනතාවට මතක නැත.

සාමාන්‍යයෙන් මේ ජන බල මෙහෙයුම් පාද යාත්‍රා කරන අයට ආණ්ඩු හදන්න ලැබෙන්නේ නැත. ඇමැතිකම් කරන්න ලැබෙන්නෙත් නැත. 2001 ජන බල මෙහෙයුම කළේ ගාමිණී අතුකෝරලය. ආණ්ඩුව හදලා දවස් දෙක තුනකින් ඔහු මියගියේය. 2005 ජන බල මෙහෙයුම 2005 සිට 2015 තෙක් එ.ජා.ප. උද්ඝෝෂණ සංවිධානය කළේ තිස්ස අත්තනායකය. එ.ජා.ප.ය දිනන කොට ඔහු විපක්‍ෂයේය. 1992 පාද යාත්‍රා කළේ අනුර, මහින්ද සහ රාජපක්‍ෂය. අනුර සහ රාජිත එ.ජා.ප.යට ගොස් විපක්‍ෂයට ගියේය. මහින්දට යන්තම් ඇමැතිකමක් ලැබිණි. 2003 'ඉවසුවා ඇති' ශ්‍රී ල.නි.ප. උද්ඝෝෂණය කළේ මංගලය. ඔහු 2004 හදපු ආණ්ඩුවේ අවුරුදු 3ක්වත් ඉන්න ලැබුණේ නැත. මේ පාද යාත්‍රාවේ සංවිධායකයන් වන රාජපක්‍ෂලාටත් ඒකම වෙයිද කියන්න දන්නේ නැත.

උපුල් ජෝශප් ප්‍රනාන්දු

Share on Google Plus