දේශප්‍රේමී ගෝටාගේ දේශද්‍රෝහී වැඩ.


හිටපු ආරක්ෂක ලේකම් නන්දසේන ගෝඨාභය රාජපක්ෂ මේ දිනවල අලුත්ම භූමිකාවකට පණපෙවීමට අරඅඳිමින් සිටින බව මාධ්‍ය වාර්තා කරයි. ජනාධිපති මෛත්‍රීපාල සිරිසේන මහතා යටතේ ශ්‍රී ලංකා නිදහස් පක්ෂයේ නියෝජ්‍ය නායකයා වීමට ගෝඨාභය සිහින දකිමින් සිටී.

ඒ සඳහා ගෝටාට පාර කපන ඔහුගේ හිතවතුන් කියාසිටින්නේ ගෝඨාභය කිසිදු දූෂණයකට භීෂණයකට චෝදනා නොමැති සුපිරිසිදු චරිතයක් බවයි. ගෝටාට එරෙහිව චෝදනා පැවතියද ඒවා කිසිදු අධිකරණයකින් ඔප්පු වී නොමැති බවට ඔවුහු තර්ක කරති.

එවන් සුධා ධවල චරිතයක් ඇති ගෝටාගේ අටානුවක් වූ 'ඩීල්වලින්' එකක පමණක් තොරතුරු පහත දැක්වේ.

තමන් නූතන 'ජෙෆ්රි බාවා' යැයි ඔහුම හඳුන්වා ගන්නා ගෘහනිර්මාණ ශිල්පී මුදිත ජයකොඩි හා එකතු වී ගෝඨාභය ආරක්ෂක අමාත්‍යංශයෙන් රුපියල් මිලියන 173 ක් ගසාකෑ ආකාරය මේ වනවිට ජනාධිපති ලේකම් කාර්යාලය සිවු පුද්ගල කොමිසමක් මගින් තහවුරු කරගෙන තිබේ.

කැබිනට් මණ්ඩලයේ තීරණය අනුව 2015 අගෝස්තු 05 වන දින බත්තරමුල්ල, අකුරේගොඩ ආරක්ෂක මූලස්ථාන ගොඩනැගිලි ව්‍යාපෘතියේ (කොළඹ පෙන්ටගනය) සිදු වූ අක්‍රමිකතාවයන් විමර්ශනය කිරීම සඳහා විදේශ සේවා නියුක්ති කාර්යාංශයේ ලේකම් ජී.එස්. විතානගේ මහතාගේ සභාපතිත්වයෙන් නිවාස හා ඉදිකිරීම් අමාත්‍යංශයේ අධ්‍යක්ෂිකා එස්.ඩී.එච්. ද සිල්වා සහ මහජන මුල්‍ය දෙපාර්තමේන්තුවේ අධ්‍යක්ෂක පී.බී.එස්.සී. නෝනිස් සහ එච්.එම්. අජිත් චන්ද්‍ර යන සාමාජිකයන්ගෙන් සැදුම් ලත් විමර්ශන කමිටුව මෙම අක්‍රමිකතාවයන් පිළිබඳව විමර්ශන සිදුකර ස්වකීය වාර්තාව මීට මාස හයකට පමණ ඉහතදී රජයට ලබාදී ඇතත් කමිටුවේ නිර්දේශයන් රජය විසින් මේ දක්වා ක්‍රියාත්මක කර නැත්තේ තවමත් ගෝඨාභයගේ අදිසි හස්තය ආරක්ෂක අමාත්‍යංශය තුළ ක්‍රියාත්මක වන හෙයිනි.

තමා ජෙෆ්රි බාවාට සමාන කරගන්නා මුදිත ජයකොඩි දේශමාන්‍ය ජෙෆ්රි බාවාට පමණක් නොව සමස්ත ගෘහනිර්මාණ ශිල්පී වෘත්තියටම ප්‍රබල නිගාවක් සිදුකිරීම සම්බන්ධව ශ්‍රී ලංකා ගෘහනිර්මාණ ශිල්පීන්ගේ සංගමය වහාම පරීක්ෂණ පවත්වා ඔහුට එරෙහිව විනය ක්‍රියාමාර්ග නොගතහොත් ජෙෆ්රි බාවා වැන්නවුන් වෘත්තීයට ලබාදුන් කීර්තිය සුන්නද්දූලි වී යනු ඇත.

කොළඹ පෙන්ටගනය පිළිබඳ විතානගේ වාර්තාව


විමර්ශන වාර්තාවේ දක්වා ඇත්තේ ගෝඨාභය රාජපක්ෂ මෙම කොන්ත්‍රාත්තුව මුදිත ජයකොඩි ඇසෝසියේට් සමාගමට ලබාදීම සඳහා ඉදිරිපත් කළ කැබිනට් පත්‍රිකාව සහ මුදිත ජයකොඩි ඇසෝසියේට් සමාගම ඒ සඳහා ලබාදුන් ව්‍යාපෘති යෝජනාව (Project Proposal) මේ වනවිට ආරක්ෂක අමාත්‍යංශයෙන් අතුරුදන් වී ඇති බවයි. ගෝටාගේ අදිසි හස්තය තවමත් ආරක්ෂක අමාත්‍යංශය තුළ ක්‍රියාත්මක වන බවට මෙය කදිම සාක්ෂියකි.

මුදිත ජයකොඩි ඇසෝසියේට් ප්‍රයිවෙට් ලිමිටඩ් (MJAL) මෙම ව්‍යාපෘතියේ ප්‍රමුඛ උපදේශකයා වශයෙන් 2011 ජනවාරි මස 25 වන දින කැබිනට් මණ්ඩලය විසින් පත්කර ඇත්තේ කිසිදු ටෙන්ඩර් කැඳවීමකින් තොරවය. වර්ෂ 2006 අප්‍රේල් මස 05 වන දින MJAL සමාගම ආරක්ෂක අමාත්‍යංශයේ උපදේශකත්වයට පත්කොට ඇත්තේ එම සමාගම, සමාගම් මැදුරේ සමාගමක් ලෙස ලියාපදිංචි කිරීම පෙරාතුව බව විතානගේ වාර්තාවේ සඳහන් වේ. එකී සමාගම ඒ වනවිට ශ්‍රී ලංකාවේ වරලත් ගෘහනිර්මාණ ශිල්පී සංගමයේ සාමාජිකත්වය හෝ ලබාගෙන තිබී නැත. කෙසේ වුවද MJAL සමාගම, සමාගමක් ලෙස ලියාපදිංචි වී ඇත්තේ 2010 ඔක්තෝබර් මස 27 වැනිදා වන අතර ශ්‍රී ලංකාවේ ගෘහනිර්මාණ ශිල්පී ආයතනයේ ලියාපදිංචිය ලබා ඇත්තේ වර්ෂ 2011 නොවැම්බර් මස 02 වැනිදාය. 
මෙම සම්පූර්ණ ව්‍යාපෘතියේ උපදේශක ගාස්තු ලෙස ව්‍යාපෘතියේ මුදලින් 5.5% ක් ගෙවීමට නියමිත වේ. මෙම 5.5% ක උපදේශන ගාස්තුව MJAL සමාගමට 1.5% ක් හා මෙහි ඉදිකිරීම කටයුතු කරන Central Engeneering Consultancy Bureau (CECB) වෙත 4% ක් ලෙස බෙදීගොස් තිබේ.



ඒ අනුව මුදිත ජයකොඩි ඇසෝසියේට් සමාගම වෙත රුපියල් මිලියන 606.03 ක් සහ CECB සමාගම වෙත රුපියල් මිලියන 1556.90 ක් ගෙවීමට 2014 ජූලි මස 10 වන දින පැවැත්වූ කැබිනට් මණ්ඩලයේදී අනුමැතිය හිමිව තිබේ. මොවුන් මෙම ගණනය කිරීම් කර ඇත්තේ මෙම ව්‍යාපෘතියේ පළමු අදියරේ වියදම රුපියල් බිලියන 40 ක් ලෙස ඇස්තමේන්තු කිරීමෙනි.

ගෝටාගේ අනුමැතියෙන් මුදිතට වැඩිපුර මුදල්


ඒ අනුව මුදිත ජයකොඩි ඇසෝසියේට් සමාගම පසුගිය වසරේ මැයි 31 වනවිට මිලියන 509.926 ක මුදලක් උපදේශන ගාස්තු වශයෙන් ආරක්ෂක අමාත්‍යංශයෙන් ලබාගෙන තිබේ. එය එකී සමාගමට අනුමත මුදලින් 83% ක ගෙවීමකි. නමුත් වැඩ සම්පූර්ණ වී ඇත්තේ 30.02% ක් පමණි. නමුත් මුදිත ජයකොඩි ඇසෝසියේට් සමාගම සඳහන් කර තිබෙන්නේ තම සමාගම 68.5% කාර්යය කොටසක් සම්පූර්ණ කර ඇති බවයි. එසේ ගණනය කළද ගෝඨාභයගේ නියෝගය මත ආරක්ෂක අමාත්‍යංශය මුදිත ජයකොඩි ඇසෝසියේට් සමාගමට රුපියල් මිලියන 173.5 ක් වැඩිපුර ගෙවා තිබේ. නමුත් සත්‍ය ගණනය අනුව එය රුපියල් මිලියන 347 ක් ගෝඨාභයගේ නියෝගය අනුව මුදිත ජයකොඩි ඇසෝසියේට් සමාගමට මහජන මුදලින් ගෙවා ඇත. ඊට අමතරව CECB සමාගම වෙත ගෝටාගේ නියමය අනුව රුපියල් මිලියන 146.5 ක් වැඩිපුර ගෙවා තිබේ.

නන්දසේන ගෝඨාභය රාජපක්ෂ හා මුදිත ජයකොඩි දේශප්‍රේමය මුවාවෙන් දේශද්‍රෝහී ලෙස මිලියන ගණනක් ගසාකෑ තක්කඩියන් දෙදෙනෙකි. එකෙක් යුද ජයග්‍රහණය තමාගේ තනි දායකත්වයෙන් සිදුවූවක් ලෙස පෙන්නුම් කිරීමට තැත් කරද්දී අනෙකා දේශමාන්‍ය ජෙෆ්රි බාවා තමාට සමාන කරගනිමින් මහ දවල් මංකොල්ලකෑමේ නිරත වේ. මොවුන් දෙදෙනාටම එරෙහිව දණ්ඩනීති සංග්‍රහයේ 403, 386 සහ 389 වගන්ති යටතේ දඬුවම් කිරීමට අපමණ සාක්ෂි තිබියදී මුල්‍ය අපරාධ කොට්ඨාශය හා නීතිපති දෙපාර්තමේන්තුව තවමත් අකර්මන්‍ය වී සිටින්නේ කාගේ හෝ බලවන්තයෙකුගේ ඕනෑකමටදැයි යුක්තිය අගයන පුරවැසියන් ප්‍රශ්නකර සිටිති.

-LNW

Share on Google Plus