Brexit නිසා ස්කොට්ලන්තය යළිත් නිදහස ඉල්ලයි.


මහා බ්‍රිතාන්‍යය යුරෝපා සංගමයෙන් ඉවත්වීමට ගත් තීරණයත් සමග ස්කොට්ලන්තය ස්වාධීන රාජ්‍යයක් බවට පත්වීමේ දෙවැනි නිදහස් ජනමත විචාරණයක් පිළිබඳ ඉඟි පළ වී තිබේ.

Brexit ලෙසින් හැඳින්වුණු මෙවර ජනමත විචරණයේ ප්‍රතිඵලය සමග මහා බ්‍රිතාන්‍යයේ ඒකාබද්ධ රාජ්‍යයක් ලෙස ස්කොට්ලන්ත ජනතාව අකමැති තීරණයකට හිස නැමීමට ඔවුන්ට සිදුවීම මෙවැනි ඉඟියක් පළ වීමට හේතු වී යැයි ස්කොට්ලන්තයේ ප්‍රධාන අමාත්‍යවරයා ලෙස කටයුතු කරන නිකොලා ස්ටර්ජෙන් පවසා තිබේ.

මිලියන පහක පමණ ජනතාවක් ජීවත් වන ස්කොට්ලන්තයේ වැසියන් පසුගිය බ්‍රහස්පතින්දා පැවති ජනමතවිචාරණයේදී තවදුරටත් යුරෝපා සංගමයේ රැඳී සිටිය යුතු බවට ඡන්දය ප්‍රකාශ කර තිබුණේ, 62% ක ඉහළ ප්‍රතිශතයක් සමගිනි. එහිදී, ඊට එරෙහිව ඉන් ඉවත් විය යුතු බවට ලැබී තිබුණේ 38% ක ඡන්ද ප්‍රතිශතයක් පමණි.

නමුත්, සමස්තයක් ලෙස මහා බ්‍රිතාන්‍යය ලෙස ගැනීමේදී යුරෝපා සංගමයෙන් ඉවත් විය යුතු බවට 52% ක ඡන්ද ප්‍රතිශතයක් ලැබීම තුළ, ස්කොට්ලන්ත ජනතාවට ඔවුන් අකමැති තීරණයකට හිස නැමීමට සිදුවීම තුළ මේ අර්බුදය හටගෙන ඇත.

මේ තත්ත්වය ප්‍රජාතන්ත්‍රවාදීව පිළිගත නොහැකි තත්ත්වයක් බවත්, ඒ අනුව නිදහස් ජනමතවිචාරණයකට කාලය එළැඹ ඇති බව තමාගේ විශ්වාසය බවත් ප්‍රධාන අමාත්‍යවරිය වැඩිදුරටත් පවසා තිබේ.

ඒ අනුව, මෙවැනි නිදහස් ජනමතවිචාරණයක් පැවැත්වුවහොත්, වර්ෂ 300කට අධික එංගලන්ත හා ස්කොට්ලන්ත ඒකාබද්ධතාව අවසන් වනු ඇති බවයි.

මීට පෙර 2014 වසරේදී පැවැත්වූ නිදහස් ජනමතවිචාරණයේදී 55% ක වැඩි ඡන්දයෙන් ස්කොට්ලන්තය මහා බ්‍රිතාන්‍යයෙන් වෙන් නොවිය යුතු බවට ප්‍රතිඵලයක් ලැබුණත්, මේ අවස්ථාව ස්කොට්ලන්තයට තීරණාත්මක අවස්ථාවක් වී තිබේ.

Share on Google Plus