බැසිල් හා නාමල්ටත් ළඟදීම.


අභ්‍යන්තර ගුවන් ගමන් සඳහා රුපියල් ලක්‍ෂ 1500 ක රජයේ මුදල් වැය කළ බව කියන සිද්ධිය සම්බන්ධයෙන් හිටපු ආර්ථක සංවර්ධන ඇමැති බැසිල් රාජපක්‍ෂ සහ පාර්ලිමේන්තු මන්ත්‍රී නාමල් රාජපක්‍ෂ මහත්වරුන්ගෙන් බරපතළ මූල්‍ය අපරාධ විමර්ශනය සඳහා පත්කළ ජනාධිපති කොමිසම ඉදිරි සති දෙක ඇතුළතදී ප්‍රශ්න කිරීමට නියමිතය.

මෙම සියලු ගුවන් ගමන් වියදම් රට අභ්‍යන්තරයේ ගුවන් ගමන් සඳහා පමණක්‌ කළ ඒවා වීම විශේෂත්වයක්‌ බව ජනාධිපති කොමිසම පවසයි.

ජනාධිපති කොමිසමෙන් ලැබෙන ආරංචි මාර්ග පවසන අන්දමට බැසිල් රාජපක්‍ෂ මහතා වසර දෙකක කාලසීමාවක්‌ තුළ අභ්‍යන්තර ගුවන් ගමන් සඳහා රුපියල් ලක්‍ෂ 1052 ක රජයේ මුදල් වියදම් කර ඇත.

මෙම අභ්‍යන්තර ගුවන් ගමන් වැඩි ප්‍රමාණයක්‌ පසුගිය ජනාධිපතිවරණය සමයේ සිදුකළ ඒවා බව විමර්ශනවලින් හෙළි වී තිබේ.

මේ අතර පාර්ලිමේන්තු මන්ත්‍රී නාමල් රාජපක්‍ෂ මහතා වසර පහක්‌ තුළදී සිය අභ්‍යන්තර ගුවන් ගමන් සඳහා රුපියල් ලක්‍ෂ 500 කට වැඩි රජයේ මුදලක්‌ වැයකර ඇති බව පරීක්‍ෂණවලින් අනාවරණය වී ඇත.

මේ සම්බන්ධයෙන් පුළුල් විමර්ශන මේ වන විට ක්‍රියාත්මක කරගෙන යන අතර ඉදිරි සති දෙක ඇතුළතදී බැසිල් රාජපක්‍ෂ සහ නාමල් රාජපක්‍ෂ යන මහත්වරුන්ගෙන් ප්‍රශ්න කර ප්‍රකාශ ලබාගැනීමට නියමිත බව ජනාධිපති කොමිසම ආරංචි මාර්ග කියයි.

මේ අතර, අභියාචනාධිකරණ විනිසුරු ප්‍රීති පද්මන් සූරසේන මහතා සභාපතිත්වය දරන බරපතළ වංචා දූෂණ රාජ්‍ය සම්පත් අවභාවිතය පිළිබඳ පරීක්ෂණ පවත්වන පංච පුද්ගල ජනාධිපති පරීක්ෂණ කොමිසන් සභාවට ජනාධිපති මෛත්‍රීපාල සිරිසේන මහතා විසින් අතිවිශේෂ ගැසට් නිවේදනයකින් පුළුල් බලතල පවරා ඇත.

එම අතිවිශේෂ ගැසට් නිවේදනය වන්නේ පෙබරවාරි පළවැනි දිනැති අංක 1952/2 දරන ගැසට් නිවේදනයයි.

ඒ යටතේ කොමිසන් සභාව විසින් යම් තැනැත්තකුගේ තැනැත්තියකගේ ක්‍රියා කලාපය පිළිබඳව පරීක්ෂා කරගෙන යන විටදී ඔවුන්ට අදාළ බැංකු ගිණුම් විස්තර සහ දේශීය ආදායම් කොමසාරිස් ජෙනරාල්වරයා වෙත පවතින තොරතුරු ලිඛිතව කොමිසමට ලබාදෙන ලෙසට ශ්‍රී ලංකාවේ පිහිටි බැංකුවල කළමනාකරුවන්ට සහ දේශීය ආදායම් කොමසාරිස් ජෙනරාල්වරයාට ලිඛිතව දැනුම් දීමක් අති විශේෂ ගැසට් පත්‍රය තුළින් සිදු කර ඇත.

අදාළ තැනැත්තාගේ හෝ තැනැත්තියගේ පමණක් නොව ඔවුන්ගේ ස්වාමිපුරුෂයා, භාර්යාව දරුවන්ගේ බැංකු ගිණුම් විස්තර පවා කොමිසමට දැනුම් දිය යුතුය.

ඊට අමතරව දේශීය ආදායම් කොමසාරිස් ජෙනරාල්වරයාගේ සන්තකයේ හෝ පාලනය යටතේ පවතින ලේඛනවල සහතික පිටපත් ද කොමිසමේ අවශ්‍යතාවය මත ලබාදිය යුතුය.

Share on Google Plus